அறமே இறை! நேர்மையே வழிபாடு!

'குட்டி' சொர்க்கம்

2009-09-10T23:45:00.003+04:00

ஆசைகள் உள்ளவரை
கவலைகள் தொடர்ந்து வரும்
உடமைகள் எண்ணும்வரை
கனவுகள் விளைந்து வரும்
இரண்டின் விளைநிலமும்
இன்றில் நிற்கவிடா இழிமனமே

நடப்பவை யாவும்
நாயகன் உளப்படி;
திடமாய் இதை உணர
தெளியும் சிந்தை

அவனியில் எல்லாம்
அனுபவமாய்க் கண்டால்
குழந்தையின் குதூகலம்
நிச்சயம்... நிரந்தரம்.

ஏமம் செய்த ஏலம்

2009-08-22T14:38:00.001+04:00

ஒரு வன இலாகா அதிகாரியின் மனைவி 8000 ரூபாய்க்கு
விற்கப்பட்ட செய்தி நெஞ்சைக் கிழித்ததில் கொட்டிய சில வரிகள்.
--------------------------------

“ஏமம் செய்த ஏலம்”

தலைமைக் கணவனின் சூதாட்டப் பொருளாய்
செத்துக் கெடுத்தவனின் சிதை விறகாய்
குஷ்டக் கணவனின் பயண ரதமாய்
பெண்கள் 'பொலிந்த' பெரு நாடிது.

முன்னோர் வகுத்த முறை தவறாமல்
என்னை விற்றான் என் அருங் கணவன்
காதல் மயக்கத்தில்
'மாமா' என நான் விளித்ததுண்டு
இன்றதற்கு வேறு பொருள் கொடுத்தான்
நன்றி கெட்டவன்.

தேவி பக்தர்களே, ஒரு நிமிடம்
நாங்கள் யார்,
பொருளா, விறகா, ரதமா?
தெய்வம் எனப் பசப்ப வேண்டாம்

பொன்னென்றும், பொருளென்றும்
முத்தென்றும், மணியென்றும்
கொஞ்சியபோது மதி மயங்கினோம்;
தெளிந்தபோது விதி விளங்கினோம்.

எங்களை வணங்கவும் வேண்டாம்;
விற்கவும் வேண்டாம்.
வாழ்த்தவும் வேண்டாம்;
வதைக்கவும் வேண்டாம்.

அர்த்த நாரீஷ்வரா!
பாதி அழுகிய பகவானே
இனி எங்களைப்
பசுவாகவாவதுப் படை
(காக்கத் தனிப்படை உண்டே)
வெட்கம் கெட்ட இவ்/இல் வாழ்க்கைக்கு
விலங்கு வாழ்க்கையே கௌரவம்.

கொடு

2009-08-15T16:28:00.003+04:00

பொருள் கிடைத்தால், பொருள் கொடுப்பேன்
அருள் கிடைத்தால், அருள் கொடுப்பேன்

பொருளை
காணாதவர்க்குக் கொடுத்தால்
கருணை என்கிறார்கள்;
கண்டவர்க்குக் கொடுத்தால்
காமம் என்கிறார்கள்.

எனவே
பொருள் வேண்டாம் இறைவா
அருள் கொடு.
பின்
யாருக்குக் கொடுத்தாலும்
கருணையே நிலையாகும்.

உனக்கும் எனக்கும்

2008-08-21T14:02:00.005+04:00

இன்று

என் கனவுகளும்

கவலைகளும்

உன் காலடியில்

படையல்களாய்

ஆலிங்கனம் வேண்டி.

காலத்தில் வருவாய்;

கவலையில்லை.

ஆனாலும்

கதவைத் தட்டிக்கொண்டே இருப்பேன்

உன் உறக்கம் கலைக்க அல்ல

என் மயக்கம் விலக்க.

- - - - - - -

என்னைச் சுற்றி

ஏராளமாய்ப் பூதங்கள்.

விலக்கும் வழி,

உன்னை வேண்டுதல் அல்ல;

என்னைத் தோண்டுதல்.

- - - - - - -

சுற்றிச் சுற்றி வருகிறது

ஒரு ஈ

என்னுள்ளே இருக்கும்

ஒரு ஈயின் பிம்பமாக

ஆம்

இன்னும் நான்

அவ்வப்போது

மலங்களின் மீது.

- - - - - - -

வெண்ணை மலையில்

குடியிருப்பு

வீதியில் நெய்வேண்டிப்

பரிதவிப்பு.

- - - - - - - - -

அண்டத்தில் ஒரு தூசு

சூரியன்;

சூரியனில் ஒரு தூசு

பூமி;

பூமியில் ஒரு தூசு

இல்லம்.

உள்ளே முழு அண்டம்

உனக்காகக் காத்திருக்க

தூசுகளின் தூசு மீது

உள்ளம்.

- - - - - - -

மீண்ட சொர்க்கம்

2008-08-20T17:33:00.002+04:00

பெருங்கருணைத் தாயே
பேரறிவுத் தந்தையே
உங்களை மறந்து
மண்ணிலே இறைந்து
இன்று
மனம் வருந்தி
மன்னிப்பு வேண்டி
திருமுகம் காண
கதவைத் தட்டிக்
காத்திருக்கிறது
உங்கள் மழலை
அம்மையப்பனே
அடைக்கலம் தா.

தந்தையே எந்தன்
கொடுங்காமம் கொல்க
தாயே எந்தன்
கடுங்கோபம் வெல்க
இரட்டைத் தடுப்புகளும்
இடிந்து போகட்டும்
இறைவனின் இறக்கம்
இப்பொழுதே ஆகட்டும்
ஊடகமாக மாறுவேன்
உலகம் உய்ய.

பாதிக்கிணறு

2008-08-04T09:50:00.002+04:00

இது
ஒருவர் வாழும் ஆலயம்

நான் விழித்திருக்கையில்
நீ உறங்குகிறாய்;
நான் உறங்குகையில்
நீ விழிக்கிறாய்.

நான்
எனக்குள் நீ
உனக்குள் நான்
நீ.

அன்று
இன்று
நாளை
என்று?

வழிவிடு - வழிபாடு

2008-07-29T09:47:00.004+04:00

இறைவா
உன் இறக்கத்திற்கும்
உன் இயக்கத்திற்கும்
எவை எவை
தடைகளோ
அவைகளைச்
சுட்டுவதும்
வெட்டுவதும்
உன் பொறுப்பு

கைகட்டி வாய்பொத்தி
வழிவிடுவதே, என் இருப்பு.

கைகட்ட,
உணர்வு அடங்கி ஆசை அழியும்;
வாய்பொத்த,
மனம் அடங்கி அறிவு களையும்.

சர்வமும் சமர்ப்பணம்.

நடுவீதியில் இதயம்

2008-07-29T09:08:00.002+04:00

பாதி மனிதம் அறிவை விரிக்க
மீதி மனிதம் ஆற்றலைப் பெருக்க
சிறுபான்மை இதயம் சுறுங்கிச் சுறுங்கி
இன்று அனாதையாய்.

'வேகும் தலை' தம்பிடி பார்க்க
'சாகும் கால்' வெற்றியில் திளைக்க
‘போகாப் புனலோ' வெற்றோடையாய்.

எதிர் எதிர் துருவத்தில்
தலையும் காலும்;
அதனால்,
தடுமாறும் பருவங்களால்
பலியாகும் பூமி.

இனியும் சுருங்க இடமில்லா நிலையில்
அன்பு இதயம் பொங்கிப் பெருக
அறிவும் அடங்கும்;
ஆற்றலும் வணங்கும்.
நீதியான அன்பு
நிறையருளால் விரிந்து
அறிவையும் ஆற்றலையும்
இரு கண்களாய் ஏந்தி
ஏகன் ஆட்சியை இகத்தில் நிரப்பும்.

வாழ்க வையகம்; வாழ்க வளமுடன்.

நங்கூரமும் சுக்கானும்

2008-03-15T16:40:00.003+04:00

வேகம் கருதி வைக்கப்பட்ட
பெரிய பாய்மரத்தால்,
காமக் காற்றில்
இப்படகு தடுமாறுகின்றது.

இறைவா,
தடுமாற்றம் என்பதும்
உனது கருணையே

தறியின் தடுமாற்றம் - நெசவு;
மத்தின் தடுமாற்றம் - வெண்ணெய்;
மனதின் தடுமாற்றம் - ஞானம்.

ஞானத்திற்கு முன்பு
வேண்டாமே மரணம்.

தடுமாற்றம் தவறில்லைதான்
ஆனால் திசைமாற்றம்?

இன்றைய அவசரத் தேவை
ஒரு நங்கூரம்;
தடுமாற்றம் குறைக்க.

நாளைய அவசியத் தேவை
ஒரு சுக்கான்;
திசைமாற்றம் தடுக்க.

குப்பைக்குள் மாணிக்கம்

2008-03-15T16:29:00.002+04:00

பெருகிய வக்கிரங்களால்
மனமெலாம் குப்பைகள்

மாணிக்கம் எடுக்க
குப்பைக்குள் எறிந்தாய்

மின்னும் மாணிக்கம்
கையிலே உள்ளது;
சுவாசப்பைகளோ
மலங்களால் நிறைந்தது.
கண்கள் இருள,
கைப்பொருள் நழுவிடுமோ?

இறைவா
இது வெற்றியா,
இல்லை தோல்வியா
உனக்கு?

குண்டுச் சட்டிப் பயணம்

2008-03-15T16:15:00.003+04:00

கண்ணடைப்பு வேண்டுவது
குதிரைக்கு மட்டுமல்ல;
ஓட்டுபவனுக்கும்தான்.

எனவே
இவனை
குண்டுச் சட்டிக்குள் அடை.

பழுதில்லை
இப்பயணத்தில் தேவை
வேகமே; தூரம் அல்ல.

இவனைக் கூட்டுப் புழுவாக்கு
மாற்றம் பெறும்வண்ணம்.
மாற்றம் பெறும் வண்ணம்;
மாறுதல் எவரும் அறியாதவண்ணம்.

காய வாசம்

2008-03-15T15:55:00.005+04:00

எல்லாம் உனது
என்றுணர்ந்தபோது
'வெற்றி'யின் துள்ளல் மட்டுமல்ல
'தோல்வி'யின் துவலளும் மறைந்தது.

இரண்டுமற்ற நிலையே
எல்லையில்லா ஆனந்தம்
அன்று அறிய வைத்தாய்;
இன்று உணர வைத்தாய்.

நன்றி கூறக்கூட
இன்றெனக்கு அனுமதியில்லை;
யாருக்கு யார் நன்றி கூற.

இன்னும் ஒன்று மட்டும்
மிச்சம் உள்ளது
பெருங்காய வாசனையாக

விரைவில்
'அதுவும் போய்விடும்'
உன்
அளப்பரிய கருணையினால்.

காலக் கணக்கு

2008-03-15T15:51:00.001+04:00

இறைவன் கொடுக்க நினைப்பதை
மனிதனால் தடுக்க முடியாது;
இறைவன் கொடுக்க மறுப்பதை
மனிதனால் எடுக்க முடியாது

பெறுவதே வெற்றியல்ல:
இழப்பதே தோல்வியல்ல.

கொடுப்பதன் மூலம் தாக்கவும்
தடுப்பதன் மூலம் காக்கவும்
அவனால் முடியும்.

எனவே
பெறுவதும் சாபம் ஆகும்;
துள்ளாதே.
இழப்பதும் வரம் ஆகும்;
துவளாதே.

மாற்றுப் போர்வைகள் சுமந்துவரும்
வெற்றிகளும் தோல்விகளும்
மாறும் மாறும் காலந்தோறும்.

காலன் மாற்றும் கணக்குகளைக்
‘கண்டு’ தெளிந்தவன்
கலங்குவதில்லை, ‘தோல்வியில்’;
கர்விப்பதில்லை, ‘வெற்றியில்’.

அவன் நெஞ்சினிலே நிறையும்
நித்திய நிம்மதி.

எல்லாப் புகழும் இறைவனுக்கே.

குரு தட்சணை

2007-12-06T19:29:00.000+04:00

கொடுக்கப்பட்ட
மனக் கள்ளக்கோல்
மாங்கனியைப் பறிக்கவே;
மாதுளங்களை அல்ல.

அதிகாரத்தின் தவறான உபயோகம்
தரும் பரிதாபப் பணிநீக்கம்.

* * * * * * * * *

குருவிற்கும்
வித்தைக்கும் ஏற்ப
தட்சணையும் மாறும்.

உயர்ந்த குருவிற்கு
உன்னத வித்தைக்கு
உனது தட்சணை குறைவுதான்.

* * * * * * *

வித்தை விதைக்கப்படுவதும்
நாளை அறுக்கப்படுவதும் உறுதி.

தட்சணை அவனால்
தட்டிப் பறிக்கப்படுவதைவிட
அடிபணிந்து கொடுப்பதே
அறிவுடமை.

கொடுத்துவிடு.

விட்டில் பூச்சி

2007-12-06T19:22:00.000+04:00

‘யாதெனின் யாதெனின் நீங்கியான் நோதல்
அதனின் அதனின் இலன்’

மண்டையில் ஏற்றிய இறைவா
மனதில் ஏற்றாதது ஏனோ?

எத்தனை முறை விட்டில் ஆவது
எத்தனை முறை உயிர்த்தெழுவது
ஒரு பிறப்பில் இத்தனை மரணங்களா?

போதும் இந்த மரண விளையாட்டு,

இதுவரை காத்தமைக்கு (GUARD) நன்றி
இனி விஷப்பரிட்சை இல்லை.

இதுவரை காத்தமைக்கும் (WAIT) நன்றி
இதோ வந்துகொண்டிருக்கிறேன்.

கருகிய சிறகுகள்
காற்றிலே பறக்கட்டும்

விளக்குகளை;
குத்து(ம்) விளக்குகளை
வட்டமடிக்கும் வெட்டிச் சிறகுகள்
இனி வேண்டாம்
ஒருவழிப் பாதையில்
ஊர்ந்து வந்தாவது
உனை அடைதல் உறுதி
என்றாவது ஒரு நாள்.

கடைசி ஆசை

2007-12-06T19:15:00.000+04:00

என்றோ விழுந்த விதை
இன்றைய மழையில் விழித்தது
நீரும் உரமும் இட்டோம்
நாளும் நாளும் இட்டோம்
பூத்துக் குலுங்கின மலர்கள்
கொத்து மலர்கள் எடுத்தேன்
முத்துச் சரமும் தொடுத்தேன்
கழுத்தில் இடம் இல்லை
எனவே
கைகளில் கொடுத்தேன்.

‘மகரந்தம் மூச்சை அடைக்கிறது.
நச்சு மலர்கள்; நலமற்றவை.
அழகு பார்க்கலாம்: அணிய முடியாது’
வீசி எறிந்தாய் தொட்டியில்
விழுந்ததோ என் மனம்.

இது காலங்களாய் வளர்ந்த தோட்டம்
இனிய கனவுகளால் மலர்ந்த தோற்றம்
வெட்டி எறிய மனமில்லை
பட்டுப் போகட்டும் என விட்டுவிட்டேன்.
இனி நீரில்லை, உரமில்லை.
மலர்களே என்னை மன்னித்துவிடுங்கள்.

* * * * * * * * *

இறைவா!

முட்டாளாக்கப்படுவது
எனக்குப் புதிதல்ல;
ஆனால்
உன்னாலுமா?

தூக்குமேடையில்
இறுதி ஆசை
இயலாததே என்றாலும்
கேட்பது ஒரு சம்பிரதாயம்.

சம்பிரதாயத்தை முடித்துக்கொண்டாய்
சடங்குகளை நிறைவேற்று.

வெற்றித் தோல்வி

2007-12-06T18:56:00.000+04:00

பணிக்கப்பட்டது நிர்வாணம்
மனம் யாசித்தது கோவணம்
கிடைத்ததோ சொத்தைக் கடலை.

பட்டுக் கோவணத்தில்
பலப்பல ஓட்டைகள்
சொத்தைக் கடலையின்
சுயரூப தரிசனம்.

இறைவா
உன் விளையாடல் தெரிகிறது.

புனித நீராட்டின்
அவசியம் மட்டுமல்ல; அதன்
அவசரமும் புரிகிறது.

இதோ
கை விறகையும்
என் சிதையில் எறிகிறேன்

ஊடலில் மட்டுமல்ல
உன்னிடத்தும்
தோற்றவரே வென்றார்

சரணம்
முழுமையான சரணம்.

கருணை வேளாண்மை

2006-12-20T22:21:00.000+04:00

அன்புப் பயிர் வளர்க்க
ஆனது ஒரு வழி
நெஞ்ச மேடுபள்ளம்
உழுது சமன்படுத்து
ஆண்டவனை வணங்கி
அருள்மழை தருவி
நல்லெண்ண விதை எடுத்து
உறவு நஞ்சை எங்கும் தூவு
சிறுவட்ட நாற்றைப் பிடுங்கி
பெருவட்டத்தில் பரப்பு
பொருளுதவி உரமிட்டுப்
புண்ணியங்கள் சேமி
எதிரிகளிடம் மட்டும்
பூச்சிக்கொல்லியாய் மாறு
ஊழல் களைகள் உயிர் குடிக்கவரும்
கடுந்தண்டனைக் களைக்கட்டால்
வீணர்களை வேரறு
அன்புப் பயிர் செழித்து
அவனி நிறையட்டும்
நிம்மதிப் பெருவிளைச்சல்
நம் நெஞ்சை நிரப்பட்டும்.

மனத் தராசு

2006-12-19T16:49:00.000+04:00

காமத் தட்டும்
ஞானத் தட்டும்
மாறி மாறி ஏறி இறங்கி
ஆடும் ஊஞ்சல்
அதட்டி நிறுத்தி
நடுமுள் என்றும்
நிலையில் நின்று
வானம் நோக்கும்
வலிமை தந்து
களம் சில நின்று
வளம் பல கொன்று
விண்ணை அடைந்து
விடுதலை ஆகும்
வரம்கொடு இறைவா;
வணங்குதல் கடனே.

பஞ்ச தந்திரம்

2006-12-09T20:41:00.000+04:00

திருநடனம் காண, தெருநடனம் மூடு
சிலம்பொலி கேட்க, வம்பொலி கட
பெருவெடிப்பின் மணம் கமழ, கீழ்நாசி அடை
அருமௌன அமுதுண்ண, அழல்வாய்ப் புதை
செந்தீயில் கருக, செல்புண்கள் சிதை
ஐம்புலக் காட்டை அடியோடு அழித்து
செம்பொருள் காணும் சிந்தையில் நிறுத்து
நீ அலாத நினைப்பொன்று
நெஞ்சிலில்லா நிலைகொடு
உன்னைக் கொள்ள, என்னைக் கொல்
யானும் அழிய; எனதும் கரைய,
இறைவா!

உயிர் எழு(த்)து

2006-12-02T13:59:00.000+04:00

அழுக்கு மனம் நீக்கி,
ஆன்மாவைத் தரிசி.
இருமை விலக,
ஈகை நிறையும்.
உலகியலை உணர்ந்து,
ஊழினை நடத்து.
எல்லையில்லா இறைமையின்,
ஏகாந்தம் கண்டுணர்.
ஐயம் தெளியும்.
ஒன்றில் நிலைத்து,
ஓய்வில் விழி.
ஒளடதம் இஃதே.